អំពីសាសនាបាហៃ

សាសនាបាហៃជាសាសនាសកលលោក មិនមែនជានិកាយចេញពីសាសនាណាមួយឡើយ ដែលត្រូវបានត្រាស់ដឹងឡើងក្នុងសតវត្សទី១៩ ដោយព្រះបាហាអ៊ុលឡាហ៍។ បាហៃមានគោលការណ៍មូលដ្ឋានដូចជា ភាពតែមួយនៃមនុស្សជាតិ ភាពតែមួយនៃសាសនា ភាពតែមួយនៃព្រះ ការលុបបំបាត់ភាពរើសអើងគ្រប់ទម្រង់ ការលុបបំបាត់គន្លាតរវាងអ្នកមាននិងអ្នកក្រ ការលើកកម្ពស់សន្តិភាពជាសកល និងការរីកចម្រើនផ្នែកស្មារតី។ល។ សាសនាបាហៃជម្រុញឱ្យមនុស្សគ្រប់រូបធ្វើការរួបរួមគ្នា ដើម្បីបង្កើនសុភមង្គលនិងសន្តិភាពជាសកល។

សាសនិកបាហៃគោរព និងប្រតិបត្តិតាមព្រះបាហាអ៊ុលឡាហ៍ ដែលជាព្រះសាស្តាបន្តវេនពីព្រះសាស្តាអង្គមុន​ៗ​​​ ដូចជា៖ ព្រះអាប់ប្រាហាំ ព្រះគ្រឹស្នា ព្រះសូរ៉ូអែសស្ទ័រ ព្រះម៉ូសិស ព្រះពុទ្ធ ព្រះគ្រឹស្គ ព្រះម៉ូហាម៉ាត់ និងព្រះបប។ ព្រះបាហាអ៊ុលឡាហ៍បានត្រាស់ដឹងនូវព្រះគម្ពីរ​ជាង១០០ក្បាល ដែលជាចម្លើយទៅនឹង​សំណួរ​របស់​មនុស្សជាតិពេលបច្ចុប្បន្ននេះ។ ការបង្ហាត់បង្រៀនរបស់ទ្រង់គឺស្ថិតនៅក្នុងភាពចុះសម្រុងដ៏ល្អឥតខ្ចោះ​ជាមួយនឹងការបង្ហាត់បង្រៀនរបស់ព្រះសាស្តាអង្គមុនៗរបស់ព្រះ។

វត្តមានសាសនាបាហៃនៅកម្ពុជាចាប់តាំងពីទសវត្សរ៍២០ ហើយបច្ចុប្បន្នត្រូវបានទទួលស្គាល់ដោយរាជរដ្ឋាភិបាលនៃព្រះរាជាណាចក្រកម្ពុជា។ មិនថាសាសនិកបាហៃនៅប្រទេសកម្ពុជាឬប្រទេសណាមួយនោះ​ទេ ពួកគេមានជំនឿដូចគ្នានិងគោរពតាមការបង្ហាត់បង្រៀនរបស់ព្រះបាហាអ៊ុលឡាហ៍ ដែលជាព្រះសាស្តា​សម្រាប់យុគសម័យបច្ចុប្បន្ននេះ។ បាហៃគោរពរាល់សេចក្តីសម្រេចរបស់រាជរដ្ឋាភិបាល ប៉ុន្តែមិនពាក់ព័ន្ធ​និន្នាការនយោបាយរបស់គណបក្សណាមួយឡើយ។ បាហៃស្រលាញ់សន្តិភាពនិងសាមគ្គីភាព គ្រប់ទង្វើ​និង​សកម្មភាពទាំងឡាយណាដែរនាំទៅរកការបំផ្លិចបំផ្លាញជាទង្វើផ្ទុយពីការអប់រំនៃសាសនាបាហៃ។

ជំនឿរបស់យើង